Ում է նախազգուշացնում Նիկոլ Փաշինյանը. Դաժան կոմպրոմատներ

-ը գրում է.

Սեպտեմբերին Երեւանում ավագանու ընտրություններ են կայանալու, որը, վերլուծաբանների կարծիքով, կարող է խորհրդարանական ընտրություններից առաջ գլխավոր փորձը դառնալ: Դատելով հռետորաբանությունից, որը երբեմն անցնում է թույլատրելի սահմանները, Հայաստանի գալիք ընտրությունները կարող են աննախադեպ լինել դաժանության եւ կոմպրոմատի առումով:

Նիկոլ Փաշինյանի գլխավորած հեղափոխական ուժը երկու ակնհայտ խնդիր ունի՝ ապահովել թափանցիկ ու արդար ընտրություններ եւ կոշտ պայքար մղել հնարավոր մրցակիցների հետ: Փաշինյանի կուսակցության մրցակիցները շատ են, եւ արդար ընտրությունների դեպքում մեծ է հնարավորությունը, որ Փաշինյանը ստիպված է լինելու իշխանությունը կիսել նախկին մրցակիցների հետ:

Չնայած նախընտրական արշավը դեռ չի սկսվել, արդեն կարելի է նկատել հիմնական միտումները: Այսօր Տավուշի մարզում Նիկոլ Փաշինյանն ասել է. «Հայաստանում բոլոր ընտրակաշառք տվողները բռնվելու են և դատվելու են: Հետո չասեք՝ վայ, քաղաքական հետապնդում է: Բոլորդ բռնվելու եք և դատվելու եք»:

Ումի՞ց է սպասվում ձայների գնում գալիք ընտրություններում: Դատելով փորձագիտական գնահատականներից՝ հեղափոխական ուժերի հնարավոր մրցակիցները կուսակցություններն ու անձինքն են, որոնք պայմանական մոբիլիզացվում են Ռոբերտ Քոչարյանի շուրջ: Կարծիք կա, որ Սերժ Սարգսյանը հին բուրգի գագաթը «վերադարձրել է» Քոչարյանին, եւ հենց նա է համակարգը տանելու ընտրությունների:

Այն, որ Քոչարյանի կողմնակիցներն սկսել են լրատվամիջոցներ, թրոլներ ու ֆեյսբուքյան ֆեյքեր գնել, արդեն բազմաթիվ վկայություններ կան: Անգամ գներ են նշվում, ինչպես ասում է Արման Մուսինյանը, Քոչարյանն այս անգամ մեծ փողեր է դնելու ընտրություններում:

Քոչարյանի շուրջ մոբիլիզացվում է հիմնականում ՀՀԿ-ն ու ՀՅԴ-ն: Գագիկ Ծառուկյանի Բարգավաճ Հայաստանը, սակայն, չի միացել Քոչարյանի խափանման միջոցը փոխելու երաշխավորությանը: Ավելին, ցուցադրաբար մանդատից զրկվել է Վարդան Բոստանջյանը, ով ավելի վաղ հայտարարել էր, որ դեմ է Քոչարյանի ձերբակալությանը:

Գագիկ Ծառուկյանը փորձում է հեռավորություն պահել Քոչարյանից՝ չնայած բոլորին հայտնի է, որ նրա կուսակցությունը ստեղծվել է Քոչարյանի հովանու ներքո: Ծառուկյանը գործընկերային հարաբերություններ է պահպանում Նիկոլ Փաշինյանի հետ՝ փորձելով ցույց տալ, որ Փաշինյանի մրցակիցը, առավել եւս, հակառակորդը չէ: Այդուհանդերձ, Երեւանի քաղաքապետի ընտրություններին Ծառուկյանն առաջ է բերում «ծանր հրետանին»՝ Նաիրա Զոհրաբյանին, ով հայտարարում է ընտրություններում հաղթելու եւ առաջին կին քաղաքապետը դառնալու մտադրության մասին:

Դժվար է ասել, թե ինչ ելք կունենա Երեւանի քաղաքապետի ընտրությունը, բայց կարելի է ենթադրել, որ Գագիկ Ծառուկյանը կարող է գլխավոր մրցակիցը դառնալ խորհրդարանական ընտրություններում: Ամենայն հավանականությամբ, նրան է նաեւ ուղղված ընտրողներին չգնելու նախազգուշացումը, այլապես «կբռնենք ու կնստեցնենք»: Իզուր չէ, որ հենց Ծառուկյանի կուսակցությունն էր դիմադրում խորհրդարանում բարեգործության մասին օրենքի փոփոխությանը, որն արգելում է նախընտրական շրջանում բարեգործական ծրագրեր իրականացնել:

Ծառուկյանի կուսակցությունը կդառնա՞ գալիք ընտրությունների գլխավոր շահառուն: Դա չի բացառվում, եթե, իհարկե, մարտի 1-ի հետաքննության շղթան չբերի Ծառուկյանի մոտ: Երեկ մեղադրանք է առաջադրվել Հովիկ Աբրահամյանի եղբորը, զենքի պահպանման համար, որը, հնարավոր է, օգտագործվել է մարտի 1-ին: Այս առթիվ խոսում են մարտի 1-ին օլիգարխների, այդ թվում՝ Գագիկ Ծառուկյանի զինված խմբերի ներգրավման մասին: Չի բացառվում, որ Հովիկ Աբրահամյանից կամուրջ կգցեն դեպի Գագիկ Ծառուկյան:

2136


Այս թեմայով Խոշոր ու ողբերգական ավտովթար Տավուշի մարզում Կոնգրեսի 48 անդամներ Թրամփին հորդորել են հանդիպել Փաշինյանին Ռոբերտ Քոչարյանին ազատ արձակելու որոշումն ապօրինի է. Հատուկ քննչական ծառայություն Ռոբերտ Քոչարյանը ազատ արձակվեց Անապատ, շամպայն, ուղղաթիռ. ինչպե՞ս է նշել իր ծննդյան օրը Մերի Մակարյանը (լուսանկարներ, տեսանյութ)